Üm dan Moattblatz vo Burgedrouth rüm (so üm näünzenhundertfuffzich)

[Zur hochdeutschen Version dieses Artikels...]

Diesen Artikel bieten wir exklusiv auch im Original Burkardrother Platt gesprochen an. Der Text steht in drei verschiedenen Formaten zur Verfügung:

Windows Media Player

Ogg-Vorbis

Real Audio

Zum Anhören benötigen Sie einen dieser kostenlos erhältlichen Abspiel-Programme:
  

Bi mi kloi woarn, woar dr Moattblatz unner Schbielblatz. Doa woar än Middooch noach die Schull, benn mi unner Hausaufgab gemoacht hadde - un die woar sellemal glaich gemoacht - ain Laawe!

Dar Moattblatz woar owwer nitt hauwer so groaß bi häützedooch. Die oi Höllft woar dr Schullgoadde, bu die Fraa vo’n Leährer alle Suädde von Gemüäs, Zeloot un Blomme gezücht hoat, und buus Öpfutz- und Weäschutzbaame gaawe hoat. Üm dan Goadde woar ä höülzerner Goaddezau rüm. Vurnedro stond dos Kriecherdenkmal un die Muddr Goddes, aigeroahmt vo riesichhoache Noadelbömm und mit murdsdrums Aiseschdeeb außerüm. Nawedro woar dr Brüün, bu bain Moatt ümmer die Marcheret vo Schwaimet ihrn Schdaand hatt, mit orich schöä Zäüch für die Kinn, so Stanniolkuchel, bu aigehäckut woan, mit ä Gummischnur dro, Zahpfeäjnsgeweärlich, Maachenbrot, kloanne Pfäüfflich, bu de ärscht mit pfäüff konnst und hinnenoach konnstese aufgeleck , und duat hoat zeladdich a dr Fritz sai Würscht verkeäfft . Bai dan Brüün konnte mer ümmer drink, benn mer Duäscht hatte und mi konnt owwer aach orich schöe die annere Kinn noosgespröütz, benn mer mit sain Damme doas Wasser aus en Rohr nit rausgeleässe hoat. Un benn bai die ganz kloanne Kinn die Noose zu orich geläücht hoat, hömm er uns aa scho ma derbarmt und hönn se durt obgewöscht.

Bai di Obbedegg woar aa ä Goadde, zegoar mit än uuraude Goaddehäüsle. Vurnedro dann Goadde woar die Wooach für die Küh. Doa wodd autzema so oas vo darre eelende Rindviiecher sich nit wieäch geläss und muässt dann mit die Peätsch drauf gedriewe waar. Vellaicht hoats scho gewosst, boss bain Anulf aufs zuküünt.

Auf dann Moatplatz schdond koi Audo droff, blooß autzema is dos Poustaudo vo Keässge kumme, doos woar aichendlich dr Omnibus. Ouwedrauf es Dooch hatts die Bageder gelode. Benns doa woar, hoats ghuppt un dann is dr Benedikt mit dan gaaue Poustkoarrn nü gfoarn und hoat die Bageder, buän dar Foahrer rogewurfe hoat, noachänanner aigeloode. Die Schdröäss woar aichendlich nit gedeert, benns doa gschaid geroant hoat, hoats ä ganz schöänne Säüerai gawe. Erscht schbeäder wurd kanalisiert und gepflastert.
Es Mellichaudo hoat zwäma än Dooch die Mellich ghoutt, sunst is blooß äma ä Küh- oder ä Gäülsfuhrwerk daant nauf- und nogerumput mitn Lädderwooche vou Haai oder mitn Miiestwooche hinnedro, bu die Miiestgowu dinngschdeckt woar.

Owwer sunst hoat dar Blatz uns Kinn ghort. Dr Boude woar orich schöä ejiwe und weäch. Benn die Buawe mit ihr Schdötzu gelaffe seänn, hatte die ainen brima Halt do dinn. Naawedro dos Pousthüggue höm mi mit Schdeckelich die Strich für „Bin ich“ und für „Bueäwenome- Meädlesnome“ derekt nai dan Boude geräitzt. Die Schdoilich, mit dare, bu mer gewurfe hönn, seänn ümmer schöe drauf liechegebliewe und mi konnte dann gehöüpf un unner Kräüzlich nai die Fejlder gemach. Mitn Ball hömer aa viel gschbielt, die Buawe Fußball, no ja bi ümmer, die Meädlich hatte annere Schbiele. Schduundenlang hömm mi dunt die Laauwe, die bu über dan Gang nai die Obedegg gewosse woar, „Rose“ no dare Obedeggere ihr Hauswaand gschbielt. Doos hoatere jo niet so orich gfaaue, autzema hoatse a gschännt.

Owwer uns hoats a nit so orich gebasst, benn se jeeden früh ihrn Potschamber vo douwero naiän Booch ausgeleert hoat. - Bai dare „Rose“ muasst mer mitn Ball zahma widd die Wand warf un wiär fang, näüma hiischlooch, ochtma hiibox , siewema Baadeles, doa seänn die Heän bi für äs Baade zommgeleijcht wurde, und doamit hoat mr dan Ball widd die Waand ghaawe- und lauder sou Bosse. Auf dare Dour gings waider bis mer bai ains woar, bu mer sich ganz schnejll rümdreäh gemüässt hoat und dann dan Ball wiear fang. „Schwarzer Mann“,„Der Fuchs geht rum“ und „Fangeles“ hömmer aa gschbielt, Ruusch woar ümmer bai die Wooach. Verschdeggeles is brima gange of dan Moattplatz. Höipfsail hömm aichendlich bloos die Meädlich gemoacht, die Bueäwe hönn sich doa viel ze orich ogschdellt.

Boass diie owwer besser gekönnt hönn bi die Meäd, dos woar es Kämpfe. Doä debai hoat ain Wuuat es annere gawe und schon woar dos Kraut fett, main liiewer Scholli ! Owwer wehe, benn diie hoanne kumme seänn, Gnaade Gott ! Maistens hönns die Meädlich scho gebeätscht ghoutt, -doas hönn die scho ümmer orich guät gekönnt- doa hoatsere dann noama gsetzt, Bruder Lack ! Doa konnts gsai, doss oaner zwäma sai Dröff gkriacht hoat.

Bar ä kloi Bobbele hatt, duafts dinn die Scheäjße odder mit ä Sportwööchele ausfoahr. Mi hönns bai die Obedegg nain Schobbich gschdeäjlt, hönnen sai Memmerle naigschdeckt und hönn waidergschbielt. Ower ümmer muasste gewäerdich sai, doss dr oaner sai Rüäwe naiheängt oder mit sain olwere Gereejd naischbäetzt.

Bain Booch muasste mer a ümmer ä wing aufbass, doss mer nit naigfluuche seänn. Dar wuad autzema gschdaut un doa woarsch a ganz schöä diäf. Die Läüt konnte duät, bu sou ä grösser viereckicher Schdoi dinn dos Wasser woar, ihr Aadöpfu für die Säü gewösch. Benns orich häeß woar, hömmer uns ä Boodwennle odder ä aaudde Wöschgällde ghoudd und hömm se duät, bu ümmer bain Moatt die Hööwelesfraa mit ihr Gschirr, bu se of die Houtzwoun ausgebreätt hatt, gsesse woar, naiän Booch gelässe un säenn dann doamit rümgfoarn. Gebaddelt hömmer mit die Schdecke, bu die Wösch mit gelüät wuade is. Autzema konnt mer dunnt die Bröücke aach ä Radde gseäh. Doa sämmer owwer fuätgerannt!

Ben mi nai die Anschdald seann, hömmer ümmer obgeköürzt , bai die Saaliä mit ihr Geäss drinoo, doos hoat mer scho aufn Waach geroche, und bain SchäckeresEdmund verbai, bu ümmer die Roahme für die Fenster zen Trockne dro die Hauswand ogelehnt woarn und bu mer ach autzema äwing Kitt gkriächt hönn, bu mer Küchelich mit mach konnt . Bain Schirmer sean mer off die Stoii durch än Booch. Doo woar mer ümmer froah, benns geklappt hoat. Benn mer bai die Hooutzmühl drinoo seänn, hatte mer orich Angst bai die DüällesRees und ihr Gäjns. Benn diie nämlich ihrrn Haauz gereckt hönn und ihrrn Schnoowu bis hinnewitt aufgeresse und dann noch gezischt hönn, doa heättste uns äma seäh söll, bi schnell mii bai doas Anschdaldsbröückle woarn.

Auf dan Moattplatz woar ümmer öbbetz loas. Benn dr Herr Bfarrer, doas woar dr ain gewichdicher Mo, mit sain Barett offn Koupf und mit sai lange schwoarze Sudaane mit gröesse Schritt nai die Kirch moschiert is, höm mer ümmer än Knicks un die Buawe än schöänne Diener gemocht und „Globbtzais Christus“ gsoat. Bai die FraOwerin, doos woar unner Lehrerin, woarsch a sou. Die Schwester Hadulfa hoat sich a alle Dooch mit ihr schwoarz Döschle es Durf dinauwere gemoacht. Die hoat der Läüt ihr offene Boi gewäeggut und lauder sou annersch medizinisches Zäüch gekönnt. Autzäma höann die aaude Freälich ä Flöschle Waihwasser hinnedinn die Kirch ghoutt un hönns die Drebblich auwere nauf än Kirfich gedrooche. Benn Baichdes woar für die Kinn, an Sunnoawed, doa woar ümmer ä murds Aufräjchung daant die Kirch. Jedr hoat no ma vur die Kirch sain Zäjdl durchgemoacht un aufgebasst, doss än jo koaner naiglotzt. Benn de owwer sölwer no nit genuch Sünn gfunne hattst, konntste aa scho ma oan gfroach, ob dar nit noch oii gewousst hoat. “Ich haabe genascht, draimal“, doos hoat ümmer gebasst.

Üm än Moattblatz rüm woarn edliche Lööde, haandäbai die Poust, doos wor ä Loode , bu mer bain Alfons mit sain waiße gschdirkde Mandel aichendlich alles krieächt hoat, boos mer so gebraucht hoat (Kolonialwaren und sbeäder Gemischtwaren schdond vurnedro ), vo Backstoikaas und Petrolium bis Saauzharing und Zichoorie, owwer a für zah Pfeäin Zöckellich nai ä Dödderle. Nawedro woar aa die richdiche Poust. Bain PoustErhard doa konnste delefonier, konnstn Viehdokter geruff oder ä Delegramm aufgega. Die PoustIrma hoat dann doahinne bai dan Delegrafenschrank die Schdecker nai die richdiche Löcher gschdeckt. Än Monadserschde hönn die Läüt ihr Rende obghout. Doa woar ümmer viel Bedrieb. Genauso bi bai die Leos Rosine ihr Keijchelboh, bu die Männer, bu koi Arwet hatte, zun Schdembeln hi seänn.

Mi Kinn woarn ümmer auf Drabb. Boos gebraucht wuadde is, duaffte mi aikäff. Nawedro die Kirch hatte die Glücklersch ihrn Loode, bai die Kochs konnt mer waiße Foode und Knöpf gekäff, bain AlisseAlwin hoats aa Neäichu un Höömer un so Zäüch gawe. Zegoor ä Frisör woar scho doa. Dr KönichsLubber hatt ainen briima Laawerkaas und ainsA brääde Fleäschwurscht. Bain Anulf hoaste dain Broade fürn Sunndich kriacht, Sobbefleäsch und bai die hoache Faierdooch für die Laawerklöässsobbe Laawer mit Nirrnstoun. Weck und Broat hoats bai die BeckeEmma und bai die MoatschebecksRosine gawe, die hatt a guade Ameriganer. Bai die Beck hoats ümmer orich guät geroche. Die Sunnoawetz hönn die Läüt ihr gröesse runde Blaacher mit Zwübbutz-, Kaas- und Öpfutzblootz und mit Sträüsutzkuche, bu äwing höächer woar, zen Backe higetrooche.

Benns äma orich woarm woar, hömm er uns die Sunndich für zah oder zwänzg Pfäijn bai die Rosine ä Ais keäff düäff. Doa hömmer uns aufn Brüün gsetzt, hönn mit die Boi gschlengert und hönn unner Ais geleggd. Nawedro bain KaiserschAndon woar aa ümmer öbbetz loas. Doas woar aine Reberadurwerkstatt mit Dankschdelle. Doa sänn die Läüt mit ihr Sachslich higeforrn un die BoadeAlwine hoat se vougedankt. Reäider hadde die kloanne Kinn sellema noch koi, doos is erschd schbeäder kumme.
Än Booch drinno woar a dr Schuäster, dr Dhedor. Bai dann hoats ümmer ganz besondersch geroche, doas woar owwer dan sai Kleeber. Autzema hömmer zugeguckt, bi dar mit sou kloanne Houdzdäcksdlich die Schuh reparieäd hoat. Benn sai Fraa, die WoochlerschMarie, gewöscht hatt, hoat se ümmer die Ünnerhouse un die Hümmer üwwer ihrn Goaddzau ghängt, naweno die Mellichkanne un die Ooamer.

Ä boor ma die Woche hoat dr Andon mit sai Scheäil drof äs Pousthüggue ausgscheäilt und hoat laut verkündt, boos für die Läüt wichdich woar, benn Frondienst woar, benn die Männer zun Schdooiklopfe nauf än Lange Berch gemüässt hönn, öbbetz vo die Gemainschaftsbrauerai in Zeällwich, vous Mellichgeäjld und lauder so Zäüch.

Die Schuell woar doa, bu häützedooch dos Rathaus schdeäht. Die kloi Schull, dos woar die erschde bis vierdde Klass und die gröess Schuell, doos woar ab die fümpfde Klass bis zu die Ochdklässer. Zwöschedinn hadd a die Gemainde ä Zümmerle. Din die Schuell hoats ümmer so äwing gemücht, elendich gschdunke hoats owwer auf dan Abort, doa hoastes lieäwer ausghaue bis Middooch. Der Lehrer Worsch, bu ümmer auf sai Benkle dunnt dan Birnbaame nawedro die Schullschäüer gsesse woar, hatt a sai aiches Gschmöckle, dar hoat sou noach Knouweling geroche, dossde än Boouche üm än rümgemocht hoast. Benn autzema die Banzer es Durf nauf gforrn seänn, Bruader Hazz, doa hönn dr aaue Schaiwe dinn die Schullschduwe gewoggut un doa hoaste dai aiches Wuät nitt verschdanne. Ower die Ami hönn uns Kinn aa ümmer Kaugummi oder öbbetzt annersch zun Nösche roogschmesse vo ihrn Banzer.

Benns Winder woar und es hadd sou richdich Schneä gemoacht, woarsch auf dan Moattplatz a orich schöä. Mit unner Schliiede sämer dos Pousthüggue nogforn, dos woar frailich nit so lang bi die richdiche Schliedeboh, douwe es Schdöützle, doadefür muasste mer a nit wait naufzieh. Off die zugfruanne Pföütsche sänmer geröütscht, sou ä richdiche Schubbere woar doos owwer nit.

Aine Schneeballschlacht hoats a autzema gawe. Die Finger hönn gebäezzut un die Aisbrocke worn unne o die Dreeningshouse higfruann. Ben dann oaner owwer auch bloß ainen Ball zeviel obkriacht hatt, oder benn er so richdich gewöscht wurde is und hadd dan Schneä hinne dinn die Angke, dann konnt mirneäsdirneäs aus dare Gaudi aine richdiche Schleijcherai gewar. Main liiewer Schiewer, mit hoachroade Köpf sänn die Kunnde bi die Bibbgöüicker aufännaner loas, hönn sich naien Schwäeitzkosde genumme und hönn sich dinn dan Schneä rümgeweälcherd. Doa is so manch oaner ganz schöe verschameriert hoanne kumme.

Oawetz, benn es Gebaat geläüt hoat, doa hoats uns owwer bressiert, doa hömmer uns schdandebenno hoannegemoacht. Do heättste aichendlich scho deheämm sai müäss!

Blooa - hoats dazumal auf dan Moattplatz aa autzema geläücht !
Owwer blooß, benn oaner vou die Quadaalsäüfer sain Ruuäs hat, benn dar ze lang bain Anulf woar oder bai die LeosRosine ze orich naigeläücht hoatt. Und benn daar dann- blau bie aine Schdrandhaubitze- mit sain Schicker dro dan Booch dinauwere gewoggut is und „die Donau so blau, so blau“ gsunge hoat, dann hoat dar vellaicht damals in sain Dilirium scho gseänn, boos er häüt doä seäh deät ! Und wailr gedoacht hoat , ha sieäht aine Fada Morgana, hoatr glaich no än Schlengerer nai bai dan Moatschebeck gemoacht, doamit er no ä wing Zait rausschinnt. Benn dar in sain vailchenblauen Zuschdand hoanne kumme is, konnts durchaus gsai, doss än sai Fraa gezwübbut hoat und ha ä Bliietzaach und no ä ganz annersch blaues Wunder aigebläüt krieächt hoat .

Doa drauf hoat sich die PoustIlse besunne, bie se dan näüe Moattblatz so in Auchenschain genumme hoat.

Kondaggd: post-ilse@rhoenline.de